-
Agnar Tómas Möller, framkvæmdastjóri sjóða hjá GAMMA
Innflæðishöft auka fjármögnunarkostnað
Agnar Tómas Möller, framkvæmdastjóri sjóða hjá GAMMA, ræddi við Viðskiptablað Morgunblaðsins um áhrif innflæðishaftanna og afleiðingar af því að þau voru hert í vikunni.
Seðlabanki Íslands herti höft á innflæði erlends fjármagns á mánudaginn. Agnar Tómas Möller, framkvæmdastjóri sjóða hjá GAMMA, segir að verið sé að stoppa í göt á fjármagnshöftum sem meðal annars tengist möguleikum erlendra aðila á að gefa út svokölluð jöklabréf.
„Það er mikill galli á útfærslu innflæðishaftanna að ekki sé gerður neinn greinarmunur á skammtíma- og langtímafjárfestum“, segir hann í samtali við ViðskiptaMoggann. Hann bendir á að meðal annars hafi verið lokað fyrir að erlendir fjárfestar kaupi órafræn skuldabréf án þess að þurfa að binda 40% fjárhæðarinnar á vaxtalausum reikningi í eitt ár, eins og krafist er með rafræn skráð skuldabréf. „Slík skuldabréf eru í flestum tilfellum illseljanleg á markaði og því undarlegt að fjárfesting í þeim sé heft ef tilgangurinn er að stöðva svokölluð „vaxtamunarviðskipti“, sem venjulega eru hugsuð til frekar skamms tíma í vel seljanlegum skuldabréfum eins og ríkisskuldabréfum“, segir Agnar Tómas.
Þörf á erlendu langtímafjármagni
Agnar bendir á að eftir að fjármagnshöftum hafi verið aflétt muni fjármagn streyma úr landi í erlenda fjárfestingu í meiri mæli en áður. „Við þessar aðstæður mun íslenskt viðskiptalíf þurfa á erlendu langtímafjármagni að halda. Eftir því sem tímanum vindur fram mun fjármögnunarkostnaður íslenskra fyrirtækja fara hlutfallslega vaxandi vegna skorts á langtímafjármagni, þar sem fjármagnskjör munu ekki ná að fylgja lækkandi grunnvöxtum. Þess vegna er brýnt að aflétta hömlum á erlenda langtíma skuldabréfafjárfestingu. Seðlabankinn stöðvaði í raun alla erlenda fjárfestingu í skuldabréfum um mitt ár 2016 með mjög harðri útfærslu á innflæðishöftunum. Þeir sem fjárfesta í skuldum þar sem lánstíminn er til margra ára eru þolinmóðir fjárfestar og því ætti að vera sjálfsagt að heimila slíkar fjárfestingar, á sama tíma og Seðlabankinn setur aðrar hömlur á innflæði skammtímafjármagns.“
Agnar segir það skjóta skökku við að á sama tíma sé erlendum fjárfestum heimilt að fjárfesta í hlutabréfum en á hlutabréfamarkaðnum geta fjárfestar allt eins fjárfest til skamms tíma sem langs tíma.
„En innflæðishöftin eru hins vegar með öllu óþörf í dag og jafnframt mjög skaðleg fyrir íslenskt efnahagslíf - því væri best að þeim væri nú með öllu aflétt, eins og Alþjóða gjaldeyrissjóðurinn mælti með í nýlegri heimsókn sinni á Íslandi,“ segir Agnar.